Туймәттән Галимовларның “Ока” двигательле тракторлары К-700 сыман

Осталар, уңганнар алар. Гаилә башлыгы Наил абый,  агач, тимер эше дисеңме – барын да булдыра. Хәзер Әлмәттә яшәүче уллары Рамил дә шундый.  Хуҗалыктагы мини-трактор – аның иҗат җимеше.

-Бер кышта ясап чыкты ул аны, “Арыгансыңдыр, кер инде”, дигәч, “Әни, мин монда шулай ял итәм”, дип, гаражыннан иртәнге якта гына кереп ята иде, - дип улын мактап алды әнисе Роза апа.

Әтиле-уллы Галимовлар  үз тракторлары белән печән чабалар, бакча сукалыйлар,  кар төрттерәләр.

-Аңа инде 10 еллап. Хуҗалыкта менә дигән техника  булды. К-700 сыман биленнән бөгелә, “шаровый”, шунысы җайлы, - ди Наил   Закир улы.

Чанаңны – җәйдән, арбаңны – кыштан әзерлә дигәндәй, Галимовларның бу көннәрдә шушы тракторга тагын бер пар - бәрәңге чәчкеч әмәлләүләре. Чирмешәндә яшәүче, каникулдагы онык Мансур да тимер белән эшләү серләрен сеңдереп үсә.

Уңган гаиләнең тимер кыру станоклары да бар, анысын Рамил эшләтә, эретеп ябыштыруларга ул алына. Ә заманында колхозда тимерче - кузнец булган Наил абый күбрәк калай бөгү мәшәкатьләрендә. Хәтта металломга ташланган тимер-тимерга шулай итеп “җан өрелә”.

Галимовларның бакчасы бик бай.  Традицион помидор, кыярдан кала,  башка яшелчә, җиләк-җимеш тә уңа монда. Кавыннары, карбызлары өлгергән. Шуның өстәвенә, Роза апа виноград белән “җенләнгән” кеше.

-Соль-Илецкига баргач,  “алешкин” сортлы ике  ботак алып кайткан идек, шуннан китте инде, - ди Роза Камил кызы.

Бүген аның “плантациясендә” тәлгәш-тәлгәш уңыш бирүче егермеләп сорт виноград үсә. “Аркадия”, “юпитер”, “брависсимо”, “запорожский” дигәннәре бар.

-Виноград үстерүнең сере дисезме, вакытында суын сибәргә, чирләргә каршы препаратлар белән эшкәртергә, анысын да вакытында башкарырга кирәк, - ди бакчачы.

Марат Гомәров фотолары