Лашманда яшәүче Рауфан Галимов йорт куяннарын йөз башка җиткергән

Оныклар Рауфан бабайларын кабат куян асрарга күндерәләр: бигрәк матурлар, йомшаклар бит. Дөрес, хәзер аның озынколаклылары күп түгел, оныкларны “алдатырлык” берничә баш кына.  
Киләсе ел – Куян елы. Рауфан Габделхай улыннан әлеге хайванның ниндиерәк холыклы булуы белән кызыксындым.

– Куян куркак дисәләр дә, аның үзенә күрә әрсезлеге, хәйләкәрлеге бар. Матур, йомшак хайван. Яшәр өчен тырмаша, йорт куянын куып тотуы да ансат түгел.

– Аппетиты? 

– Биреп кенә өлгер, бөтен әйберне ашый: кишер, кәбестә,  бәрәңге, бөртек, ипине бик ярата – ашауга талымсыз. Киләсе елда мин райондашларыма, уенын-чынын бергә кушып, куяннарныкыдай яхшы аппетит телим. Аппетит бар икән, димәк, кеше сау-сәламәт, дигән сүз. Киләсе Куян елында барыбызга да күңел тынычлыгы, гаилә иминлеге, бәхет-шатлыклар юлдаш булсын, – ди якташыбыз.

Марат Гомәров фотолары