Кызыл Чишмәнең һавасы да, суы да башка

Әкълимә апа белән Салихҗан абый Кәримовлар да Яр Чаллыда яшиләр. Ләкин яз – җәй көннәрендә Әкълимә апаның (кыз фамилиясе – Мөхәммәтова) туган ягына – Кызыл Чишмәгә юл тоталар.

Без барган көнне дә аларның капкалары ачык иде.

-Без бу йортта җиде бала үстек. Аллаһыма шөкер, барыбыз да исән-сау, Әлмәттә, Яр Чаллыда, Алабугада, Түбән Кама шәһәрләрендә яшибез, авылга балалар, оныклар белән кайтып йөрибез, әти-әнигә багышлап, Коръән ашлары уздырабыз, Авыл көнендә җыелабыз, - диде Әкълимә Мәкъсүт кызы. – Әле күптән түгел генә сеңелем, оныклары белән, ике атна торып китте, аннары апа кайтам диде. Шундый шатландым – йорт буш тормый. Ирем Минзәлә ягыннан булса да, ул да бик теләп кайта монда.

Мөхәммәтовларның бакчалары да буш тормый, бәрәңге, суган үстергәннәр. Кайтып йөрүләренең тагын бер сәбәбе бар икән – Казаннан туганнары Тәнзилә, Мөслимә, Чәчәк Минһаҗевлар да җәй айларын биредә үткәрәләр. Ике гаилә Кызыл Чишмәдә күрешә.

Сүз уңаеннан, аларның йорт янәшәсендә генә - дин йорты.

–Мәчетне авылның беренче имамы – безнең Мөхәммәт бабабыз нигезенә салдылар. Без бүген барыбыз да дин юлында. Авылга кайткач та, мәчеткә кереп, намазлар укыйбыз, - ди Әкълимә апа. – Авылның бит һавасы да, суы да башка. Менә монда кайтып күпме эшлибез, бер арытмый. Әлмәттәге апа да:”Авылга кайтсам, кан басымым да уйнамый, баш та авыртмый,” – ди.  Без үскәндә юлы гына да юк иде бит, хәзер яшәү өчен бөтен шартлар да бар, ләкин авылда кеше калмады.