Чирмешәнлеләр махсус хәрби операция зонасындагы якташларына гуманитар ярдәм озатты

Фронттагы егетләребезгә көндәлек кирәк-ярак, азык-төлек тупланган. “Соболь” автомашинасы фургоны түшәменә кадәр тулы. Әлеге күчтәнәчләрне Мордва Афонькәсе һәм Бәркәтә авыл җирлекләре башлыклары Александр Митяев, Ринат Сибгатуллин һәм “Чирмешән” балалар-яшүсмерләр спорт мәктәбе директоры  Риф Зарипов озата киттеләр. Алар  Донецк, Запорожье, Херсон юнәлешенә барачак, чама белән  5 мең километрлап юл үтәсе.

Риф Зариповның мондый сәфәргә алтынчы тапкыр чыгуы. Монысында да руль артында, нигездә, ул булачак.

-Анда егетләр безне көтеп  торалар, шатланып каршы алалар, рәхмәт әйтеп калалар. Исемле, атаулы посылкалар да бар, бөтенесен дә ияләренә тапшырырга тырышачакбыз, - диде ул.

Якташларыбызның бу сәфәре берәр атнага сузыла. Аларны озатканда район башлыгы Рамил Айбатов күмәк эшкә өлеш керткән чирмешәнлеләргә рәхмәт әйтеп, якташ хәрбиләргә сәламнәр тапшырып, юлга чыгучыларга хәвеф- хәтәрсез юл, исән-сау әйләнеп кайтуларын теләде.

Марат Гомәров фотолары