Чирмешәнле Радик Закиров К-700 тракторы “баласын” кабызды

Авыл кулибины сап-сары төстәге, буявы әле генә кипкән мини-тракторын 3 ай эчендә җыеп чыга. Августта башланган эш октябрь башында төгәлләнгән.

-Тракторның двигателе кытайныкы - мотоблокларга куела торган, 15 ат көчле, тапшырулар тартмасы - коробкасы, руль идарәсе, күчәре - мосты классика “Жигули”дан, - ди Радик Илшат улы.

Оста әлеге техника белән кышын кар төрттермәкче, аның өчен көрәге бар, җир сукалыйм дисәң, сабан тагар өчен җайланма урнаштырылган.

-Шундый трактор ясарга күптән кызыгып йөри идем инде. Чирмешәндә аны җыйган егетләр бар, алардан да сораштырдым, интернеттан да карадым, - ди якташыбыз.

Суд приставлары хезмәткәре Радик Закиров гаражында соңгы берничә айда ут соң сүнгән. К-700 тракторына охшатып ясаган, билдән бөгелүче техникасын эштән кайткач, кичләрен, ял көннәрендә җыйган якташыбыз.

-Ышанычлы, көчле, чиста эшләсен, матур булсын, дип тырыштым, - ди ул.

Марат Гомәров фотолары