Әмир авылында кондызлар казларга буа буган

- Май ахырында 25 бәпкә алган идек, берсе югалды. Аларга кондызлар тими,  песидән зуррак башка бер кара җәнлекнең инештәге кыр үрдәкләрен куганын күрдек, шул алгандыр, дибез, әллә сусар  - куница булды инде, белмибез, - ди хуҗабикә Исламия Мәсхүт кызы.

Нуретдиновлар калган бәпкәләрен көзгә кадәр исән-сау үстергәннәр: дүрт ай ярым карап, кышкылыкка итлеккә хәстәрләп куйганнар.

- Кечкенә чакларында аларга  катнаш азык бирдек, шунсыз күтәрелеп, ныгып  китә алмыйлар. Үсә төшкәч, фураждан өзмәдек. Казларыбыз бик матур, кайберләренең түшкә авырлыгы  4 килограммга кадәр җитте, - ди авыл укытучысы.

- Өмә ясадыгызмы соң? - дим.

- Әүвәл берничәсен үзем, унсигезен өмә ясап йолкыдык. Мәктәптән хезмәттәшләрем килде, рәхмәт, бик осталар: ике сәгать ярымда эшне бетерделәр дә. Бер казны шунда ук пешереп, итеннән, шулпасыннан авыз иттек. Каз өмәсе көнне бик кызык инде, - диде Исламия.

Нуретдиновлар быел бәрәңгеләрен дә уңдырганнар. Бакчаларын инештән насос белән җылы су тарттырып сугару килешкән.

- Берничә ел бәрәңгебез начар булган иде. Быел уңыш яхшы, черемә керттек, орлыкны да алыштырдык, - диделәр Нуретдиновлар

 Исламия Нуретдинова фотолары