Югары Кәминкәгә Канада күркәләре кайткан

Дистәләгән төрле кошкорт асрап, Мәссаровлар инде ничәмә еллар авылдашларын шаккатырып яши. Аның да бит әле итте-миттесен генә түгел, “иностранец”ларын. Аларны үз инкубаторларында ук йомыркадан чыгаралар икән.

– Быел бройлерларның Иза Хаббард дигән токымлысының йомыркаларын Казандагы берәү аша Канададан кайтарттык, 130 ның яртысыннан чебеш чыкты, - ди Тәнзилә.

Әлеге бройлерларның авырлыгы, өлгергәч, 2-3 килога җитә икән.

Франция цесаркаларының исә 15 йомыркадан 13 се дөньяга килгән. Алары бик сизгер, ди. Каты кычкыралар: эттер, мәчедер күрсәләр: “SOS, коткарыгыз” дигәндәй, бик көчле, машина сигналыдай тавыш бирәләр. “Французлар” да, күркәләр кебек, хуҗабикәнең татарча “чи,чи,чи!” дип ашарга чакырганын бик яхшы аңлыйлар икән.

– Чит ил кунаклары ашауга талымсызмы, нәрсә ашатырга? – дигән соравыма, Тәнзилә:

– Әүвәл махсус катнаш азык бирдем. Хәзер барысы да пешергән авыл бәрәңгесенә дә ияләштеләр, фураж салам. Җиткер генә.

Хайбрид Конвертер токымлы күркәләр дә – Канаданыкы, 30 йомырка кайтарткан булганнар, шуларның 15е “уңдырышлы” булган. Үскәч, авырлыклары, 20 килограммнарга җитә, имеш, ничек булыр бит, диләр хуҗалар.

Мәссаровларның өч инкубаторы бар. Анда алар каз бәпкәләре дә чыгарып, 2-3 ай үстереп, беразын сатканнар, үзләренә дә калдырганнар.

Уңган гаилә, кош-корттан кала, мөгезле эре терлек асрарга да вакыт таба. Иртә торып соң ятарга күнеккән алар. Иркәләнеп ятсаң, цесаркалар бик тиз уята.Әнә тавышлары машина сигналыныкы сыман, ди бит...

автор фотолары