Узган язда Чирмешән районында өч мунча янган

Районның янгын күзәтчелеге хезмәтеннән хәбәр итүләренчә, статистика буенча, язгы-җәйге чордагы янгыннарның яртысыннан күбрәге үлән, корылмалар тирәсендә чүп-чар яндыру, сүндерелмәгән тәмәке төпчеге, балаларның ут белән шаяруы сәбәпле чыга икән. Эссе коры көннәрдә гади генә коры үлән дә – дары сыман.

-Узган 2021 елның апрель-май айларында янгын сүндерүчеләр район территориясендә 39 тапкыр ут чыгу урынына барды, шулардан: егерме тугызысында коры үлән һәм чүп-чар, өчесендә мунча, икесендә абзар, икесендә хуҗасыз бина һәм берәр тапкыр торак йорт, фатир һәм гараж янды, -ди райондагы янгын күзәтчелеге хезмәте инспекторы Фәнил Гыйззәтуллин.

Янгынны булдырмас өчен, түбәндәге саклану чараларын үтәргә кирәк:

-территорияләрне, ишегалларын җыештырганда, биналарга якын арада чүп-чар яндырмагыз; янучы чүп белән корылмалар арасындагы ераклык кимендә 50 метр булырга тиеш. Коры һәм җилле көннәрдә чүп-чар яндыру тыела;

-коры үләнгә ут төртмәгез, ул бик тиз яна, ә җилдә ут бик тиз тарала һәм ул якындагы агачларга һәм корылмаларга күчәргә мөмкин;

-торак, төзелеш һәм башка биналарга юлларны капламагыз, бу янгын сүндерү техникасының узуына комачаулык итәчәк.

-Хуҗалыкларда җыелган чүп-чарны контейнерга җыярга һәм махсус җиһазландырылган чүп-чар мәйданчыгына алып китәргә кирәк, ә йорт янында язгы һәм җәйге чорда янгынны сүндерү өчен беренчел чаралар: 200 литрдан да ким булмаган күләмдә су салынган мичкә, чиләк, комлы әрҗә, көрәк һәм багорлар булдырыру мөһим, - ди Фәнил Гыйззәтуллин

Янгын чыккан очракта, әлеге хәл турында кичекмәстән янгын сагына 01 яки 2-57-01 телефон номерына, кесә телефоныннан 101 номерын җыеп хәбәр итәргә кирәк.

фото: Фәнил Гыйззәтуллин