Шешминка хат ташучысы көненә 10 километрлап юл үтә

Дөресрәге, хәзер почтальоннары бар, почта бинасы ремонтын гына ахырына җиткерәсе калган. Хат ташучылары - үз авылдашлары - шунда туып үскән, пенсиягә кадәр Яр Чаллыда эшләп, авылга күчеп кайткан Надежда Герасимова.

-Шешминка, Андреевка, Нагай, Павловка авыллары халкына хезмәт күрсәтәм. Авылда йорт өлгерттем,  ноябрьдән бирле почтада эшлим, - ди Надежда Анатольевна

Хат ташучы почта тараткан көннәрендә җәяүләп ун километрдан артык юл үтә. Барлыгы 200гә якын хуҗалыкны йөреп чыгасы. Газета-журнал тарату гына түгел, пенсия өләшү, коммуналь хезмәтләр өчен түләү алу эшен дә алып барасы. Почта таратучы булгач, авыл халкы матбугат басмаларына да күбрәк языла башлаган.

-Халыкны әлегә өйдә кабул итәм. Тик болай аларга уңайсыз – мин өйдә булмаска мөмкин. Шуңа күрә халык почта бинасының ачылуын көтә. Миңа күбрәк 70-80 яшьлек пенсионерлар мөрәҗәгать итә, олыларны анда-монда бушка йөртү эш түгел. Авыл җирлеге җитәкчелеге дә булышкач, рәхмәт, почта бинасы бераз рәтләнде, эчтән матурланды. Тик бик иске  бинаның түбәсен, тәрәзәләрен дә яңартасы иде, - дип тә теләген белдерде хат ташучы.