Рамил Айбатов Чирмешән муниципаль районы башлыгы итеп сайланды

Рамил Тәлгать улы шул ук көнне Чирмешән авыл җирлеге башлыгы да булды, анысы җирлек Советы утырышында хәл ителде.

- Район башлыгын сайлау – җиңел мәсьәлә түгел. Ул район депутатлары арасыннан һәм республика Президенты тәкъдиме белән сайлана. Рамил Айбатов кандидатурасын район җитәкчесе постына Президент көз көне тәкъдим иткән иде, - диде Татарстан Республикасы Президенты Аппараты җитәкчесенең район Советы утырышында катнашкан беренче урынбасары - Татарстан Республикасы Президентының Территорияләр белән эшләү идарәсе башлыгы Илнур Гарипов. – Сез аны яхшы беләсез, ул муниципаль район башкарма комитеты җитәкчесе вазифаларын башкарган дәвердә үзен уңай яктан күрсәтеп өлгерде.

Район Советы депутатлары Рамил Айбатов кандидатурасын бертавыштан яклап сайладылар.

- Ышаныч белдергәнегез өчен зур рәхмәт. Минем алдымда районның социаль-икътисади үсеше белән бәйле җитди җаваплы бурыч тора. Безнең максат – районыбызны тормыш, эш, ял өчен уңайлы итү, инфраструктураны үстерү. Һәм монда мин сезнең ярдәмегезгә өметләнәм, - диде Рамил Тәлгать улы, депутатларга мөрәҗәгать итеп.

Рамил Тәлгать улы Айбатов 1969 елның 14 сентябрендә Бәркәтәдә туган. Югары белемле инженер-механик, “юриспруденция” белгечлегенә дә ия. Өйләнгән, ике бала әтисе.

Гөлсирә Шәрифуллина фотолары