Лашман мәктәбендәге бәйгедә “Юл мастеры” этабы иң кызыклысы иде

“Әтиләр һәм уллар” эгидасы астында узган ярышта катнашучыларны уен форматында юл хәрәкәте кагыйдәләре нигезләре белән таныштырдылар. Катнашучылар төркемнәргә бүленеп, аларның һәркайсы үз белемнәрен һәм осталыкларын күрсәтте.

-“Батырлык атнасы” акциясе юл хәрәкәте кагыйдәләрен белү һәркемнең бурычы гына түгел, ә барыбыз өчен дә куркынычсыз киләчәккә мөһим адым булуын күрсәтте. Бәйге әтиләрнең уллары белән бергәләшеп вакытларын кызыклы һәм мавыктыргыч итеп үткәрүгә дә бер форсат булды, - ди  “Юл хәрәкәте иминлеге” дәүләт бюджет учреждениесенең райондагы профилактика бүлеге җитәкчесе Гөлия Кәбирова.

Ярышлар юл хәрәкәте куркынычсызлыгы буенча әңгәмәдән башланды, аннан соң катнашучыларга юл хәрәкәте кагыйдәләре буенча мәгълүмати материаллар тараттылар. Бәйге берничә этаптан торды, иң кызыклыларының берсе – “Юл мастеры”, анда командалар юл билгеләрен белүдә ярыштылар.

Чара барышында әтиләр һәм уллар бергәләп кагыйдәләрне генә кабатлап калмыйча, үзара мөнәсәбәтләрен дә ныгыттылар, бер-берсенең иминлеге турында кайгыртырга өйрәнделәр.

Гөлия Кәбирова фотолары