Чирмешән районының иң тату сыйныфы - 1нче Чирмешән урта мәктәбендә

Район мәдәният йортында узган бәйгедә өч команда көч сынашты. 2 нче Чирмешән урта мәктәбенең 8 сыйныфның һәм Ивашкино урта мәктәбенең 5 сыйныфның ата-аналары да әлеге чарага бик җитди әзерләнгәннәр.

- Бәйге таләбе буенча укучылар һәм әти-әниләр бергәләп аерым бер сыйныфның ничек дус яшәвен күрсәтергә, бергәләп оештырган чаралар турында сөйләргә тиеш, -диде район мәгариф бүлеге начальнигының тәрбия эшләре буенча урынбасары Флера Рәхимҗанова.

Чара башланыр алдыннан җюри сыйныфларның фотоальбомнары, стена газеталары, плакатлары белән танышты.

Бәйге өч этаптан торды. Әүвәл һәр команда үзенең “визит карточкасын” күрсәтте, үзе белән таныштырды, аннан соң аерым проектны якладылар һәм сәнгать номеры күрсәттеләр.  

Быелгы бәйге Цифрлаштыру елына багышланган, мәктәп вәкилләре үз чыгышларын әлеге темага туры китереп төзегәннәр. Өч команда да тырышкан, һәрберсе үзенчәлекле, ләкин җюри фикере буенча, 1 нче Чирмешән мәктәбе командасының чыгышы яхшырак булды. Алар бүгенге ярышта беренче урынны яуладылар һәм 20 мең сумлык сертификатка ия булдылар.  Ивашкино мәктәбе – икенче, 2 нче Чирмешән мәктәбе өченче урында.

фото: автор