Сак булсалар, чирмешәнлеләр дә шашлык кыздыра ала

Тик янгын күзәтчелеге белгечләре бу эшне бик саклык белән генә башкарырга киңәш итәләр. Мөгаен, төп шарт - көн җилсез булырга тиеш. Шашлыкны корылмалардан 5 метрдан да якын арада кыздырырга рөхсәт юк. Мангалдан ике метр диаметрдагы мәйданда янучан әйберләр булмаска тиеш. Шашлык кыздыру өчен ачык ут куллану ярамас, әзер күмер куллану бу процессны күпкә куркынычсызрак итә.

ТР Министрлар кабинетында журналистлар өчен узган брифингта белгечләр шашлык кыздыра торган урында  су сүндерү җайланмасы, су, ком булырга тиешлеген дә әйттеләр. Мангалны караучысыз калдырырга ярамый, утка гел күз-колак булып торырга кирәк.

Мәгълүм булганча, 17 апрельдән 10 майга кадәр республикада янгынга каршы махсус режим кертелде. Бу чорда учак ягу, чүп-чар, коры үлән яндыру катгый тыела. Шулай ук 17 апрельдән башлап, 21 көн дәвамында урманнарга керү дә чикләнә. Анда барып шашлык кыздырулар, учак ягулар ярамый да ярамый.

- Урман янгыны  ул - су агымы сыман. Аны туктату, тыю бик кыен. Көннәр коры тора, зинһар, халкыбыз ут белән сак булсын иде, - диде әлеге уңайдан республиканың урман хуҗалыгы министры Равил Кузюров.