Искәндәр Биктаһировның улы Сәйдәш Биктаһиров: Әтием, рәхмәт сиңа барысы өчен дә!

«Син безне чын кеше иттең, үстердең. Мин синең белән кечкенә вакыттан бирле гастрольләрдә йөрдем. Синең белән бергә үстем дияргә була... Бик нык горурланам! Бәхил бул, әтием!» – диде Сәйдәш Биктаһиров.

Татарстан мәдәният министры урынбасары Дамир Натфуллин кичә каты авырудан соң татар эстрадасын үстерүгә зур өлеш керткән Искәндәр Биктаһировның арабыздан мәңгелеккә китүен әйтте. «Искәндәр абыйның активлыгы, эстраданың бөтен яшь җырчыларына зур үрнәк булырга тиеш. Аның үзенә генә хас булган халык җырларын башкаруы, үзенчәлеге, юлы булды. Дөрестән дә, ялга киткәч тә, ел саен Сабантуй графиклары белән кызыксынып торды. Андый кешеләр мәшһүр, алар – күренекле. Аларның җырлары безнең йөрәгебездә мәңге сакланыр», - диде ул.

Хушлашу мәрасимен Татарстанның халык артисты Фердинанд Сәлахов алып барды. Ул Искәндәр Биктаһировны халык күңелендә яшәгән шәхес дип атады. Фердинанд Сәлахов Искәндәр Биктаһировның гомеренең соңгы көннәренә кадәр сәхнәдә булуын, концертларда бергәләп эшләвен, «Илһамият» иҗат төркемендә актив катнашуын билгеләп үтте. «Артист һәрвакыт юлда, без - сәфәр кешеләре. Бу Искәндәр Биктаһировның соңгы сәфәре һәм без аңа үзебезнең хушлашу сүзебезне әйтәбез. Урыны оҗмахта булсын», - диде ул.

Габдулла Тукай исемендәге Татар дәүләт филармониясе директоры Кадим Нуруллин Искәндәр Биктаһировның китеп баруы – көтелмәгән хәл булуын әйтте. «Әмма дә ләкин, нишлисең, тормыш шулай дәвам итә. Искәндәр абый һәрберебезнең күңелендә сакланып кала торган легендар шәхесебез. Ул үзенең урынын эстрадада, сәнгатьтә аерым биләп тора. Аның тормышы безнең өчен үрнәк. Авыл җирлегеннән килеп, сәхнәгә күтәрелә алды, менә дигән ике егет үстерде. Бүгенге көндә Искәндәр абыйның мирасы безнең алдыбызда. Хушлашырга килгән һәр кешегә рәхмәт», - диде ул.

«Искәндәр барыбызның күңелендә кешелекле, үзенчәлекле, тормышка якты карашы булган шәхес буларак озак еллар сакланыр. Мин аның белән иҗат юлымны бер чорда башладым: без әле яшь егетләр, халкыбызга хезмәт итәбез дип, җиң сызганып, татар җыр дөньясына килеп кергән идек. Искәндәр халык күңеленә матур, үзенчәлекле җырлары белән кереп калды. Халыкның югалып барган җырларын халыкка кайтарып, аһәңе белән җиктерә алды», - диде Габдулла Тукай исемендәге Татар дәүләт филармониясенең сәнгать җитәкчесе Айдар Фәйзрахманов.

Татарстан Республикасы Дәүләт җыр һәм бию ансамбле директоры Юрий Жуков әйтүенчә, Искәндәр Биктаһиров иҗади эшчәнлеген ансамбльдә башлап җибәргән. «Унике ел ансамбльдә солист булып эшләде. Аның хәтере һәрвакыт безнең йөрәктә саклана. Милли сәнгатебезгә тугрылыгы өчен рәхмәт. Һәрвакыт тормышны сөючән, күңелле кеше булды. Аның йөрәге ачык иде. Безнең ансамбльдә эшләгәндә дә бик күп чыгыш ясады, гастрольләрдә йөрде. Ансамбльнең эшчәнлеге, мәдәният, татар җырының халәте, үсеше белән кызыксынып торды», - диде ул.

«Татар мәдәнияте зур югалту кичерә. Репертуары бик бай иде, халык җырларын яратып башкарды. Ул татар халкы, милләте өчен гел янып яшәде. Күптән түгел генә аның белән сөйләшеп торган идек. «Кая чакыралар – шунда барам. Җыр ул минем өчен яшәү рәвеше», - дип әйтте. Дөрестән дә, ул гел җыр белән яшәде, өендә дә, эшендә дә җырлап, безне шатландырып торды. Чакырган җиргә килә торган иде. Искәндәр абый, авыр туфрагың җиңел булсын. Тыныч йокла», - диде Казан шәһәре филармониясе директоры Наил Зыятдинов.

Җырчыны Курган зиратында җирләделәр.

 Татар-информ