Чирмешән хәзинәләре дөнья дәрәҗәсендәге геопаркка керәчәк

«Татнефт» компаниясе ЮНЕСКО халыкара геопаркын булдыру инициативасы белән чыкты, һәм Чирмешән районы – бу гаять зур башлангычның үзәгендә.

Концепция буенча фикер алышуның төп вакыйгасы Шөгер нефть музеенда узган дискуссия сессиясендә булды. Анда галимнәр, Татарстан Фәннәр Академиясе һәм Карпинский институты вәкилләре, районыбыз башлыгы Рамил Айбатов һәм мемориаль үзәк директоры Валентина Захарова да катнашты. Алар геопарк составына керәчәк территорияләрнең һәм уникаль объектларның киләчәк үсеше турында фикер алыштылар.

Оештыручылар уйлавынча, геопарк өч төп бурычны хәл итәргә тиеш: уникаль табигатьне саклап калу, икътисад һәм туризм үсешенә этәргеч бирү, шулай ук безнең бай тарихыбыз белән таныштыру.

- Беренче этапта геопаркка Лениногорск, Әлмәт, Бөгелмә һәм Чирмешән районнары территорияләре керер дип көтелә. Аның составына безнең иң истәлекле урыннарыбызны: Түбән Кармалкадагы «асфальтит чыгу урыны» геологик табигать һәйкәле; бай тарихлы һәм гаҗәеп ландшафтлы Ташказан үзәнлеге һәм төбәгебезнең данлы үткәне истәлеге булган Чирмешән крепосте керер дип көтелә, - диде Валентина Захарова.

«Татнефть» генераль директорының беренче урынбасары Рөстәм Хәлимов билгеләп үткәнчә, бу проект – тарихка дан гына түгел: «Геопарк туризм үсешенә көчле этәргеч бирәчәк, төбәкнең уникаль табигатен саклаячак, шәһәрләрнең икътисадын ныгытачак һәм яңа эш урыннары булдырачак. Һәм, иң кыйммәтлесе, ул фән һәм мәгариф үсеше өчен ныклы база булачак».

Планнар буенча, инде 2029 елга безнең геопарк ЮНЕСКОның Глобаль геопаркы статусын алыр дип көтелә.