Чирмешән районында битлек режимын бозучыларга карата 458 беркетмә төзелгән

-Кагыйдә бозучыларга карата таләпләр кырыс, - ди район полиция бүлекчәсе начальнигы вазифаларын вакытлыча башкаручы Хәлил Шарапов. – Җәмәгать урыннарында битлек режимын бозучы гражданнарга, хәлнең торышына карап, кисәтү ясалырга, яки 30 мең сумга кадәр штраф салынырга мөмкин. Вазифаи затларга штраф 30 меңнән 50 мең сумга кадәр.

Һәр көнне 4-6 полиция хезмәткәре җәмәгать урыннарында битлек режимы үтәлешен тикшерә. Алар күбрәк сәүдә нокталарында булалар, шулай ук эш урыннарында битлек режимын бозган хезмәткәрләргә һәм җитәкчеләргә карата да беркетмәләр төзиләр. ТР Президенты боерыгы нигезендә, полиция хезмәткәрләреннән тыш, бу юнәлештә, районда тагын 4 төркем эшли. Экологлар, дәүләт алкоголь инспекциясе, дәүләт техник күзәтчелеге һәм Чирмешән урманчылыгы хезмәткәрләре дә кагыйдә бозучыларга җәза бирергә - беркетмә төзергә хокуклы.

фото: архив