Туймәт фермерының әлегә 80 төргәк яңа печәне бар

-Яңгырлар соңга калдырдымы азык әзерләүне, - дим авыл фермерына.

-Калды инде, калды, кара син, ничек озын булып үсеп киткән, картая төшкәннәр инде, хет 2-3 атна алдарак чабарга иде, нишләтәсәң, - ди Альберт Наил улы.

Туймәт авылыннан Альберт һәм Рәзилә Фәссаховлар - хуҗалыкларында инде байтак еллар күп терлек асраучы уңган гаилә. Бүген алар дүрт баш сыер тота.

-Шулай гына калдырдык, исәнлек чамалы, балалар да китте. Быел дүрт сыерга биш бозавыбыз булды: берсе игезәкләрне бозаулады. Субсидия була дигәч, тагын дүрт үгез бозау алдык, - диде гаилә башлыгы.

Фәссаховларның 32 гектар пай җирләре бар. 10-сында бөртеклеләр, калганында  үлән үстерәләр. Альбертның МТЗ тракторына таккан яңа чапкычы белән шул мәйданнарны иңләгән вакытында сөйләштек.

-Кыш чыгарга уртача зурлыктагы 80ләп тюк әзерләдек инде, безгә 100 тирәсе кирәк. Артыгын сатарбыз дип торабыз. Сыерларга люцерна яхшы инде, клеверында да бөтен витамин бар, - ди ул.

-Бу эсседә тракторда йөргән кешегә дә бик кызу хәзер...

-И, и, анысына гына чыдыйсың: ишекләр, тәрәзә ачык. Шундый коры, яңгырсыз көне генә булсын, Ходаем. Мондый көнне чапкан үләннәрне ике-өч көндә җыеп  та алып була. Һава торышын гел күзәтеп торам, кичә яңгырлар күрсәткән иде – булмады үзе. Бүген дә көн яхшы әле, - дип чапкычы белән яңа теземнәр салырга кереште Альберт Фәссахов.