Чирмешән районының авыл хуҗалыгы алдынгыларына Казаннан да бүләкләрне күп җибәргәннәр

Быел хуҗалыкларыбызда 100 мең 368 тонна бөртек суктырылган. Монда бигрәк тә “БИО-АГРО” (39067 тонна), “Әккәрәй” (13511 тонна), “ЧИРМЕШӘНАГРО” (11892 тонна) җәмгыятьләре, “Тепсуркаев В. Ә” (6420 тонна) крестьян-фермер хуҗалыгы өлеше зур. Барлык игенчеләр, гомумән, бу уңышны үстерүгә керткән хезмәте өчен һәркем кадер-хөрмәткә лаек.

-Аларга да, терлекчелектә эшләүче уңганнарыбызга да зур рәхмәт. Сез  республика, район халкын һәр көнне кирәкле ризыклар белән тәэмин итәсез, - диде район башлыгы Рамил Айбатов кунакларны котлап.

“Сөлчә” җәмгыятеннән машина йөртүче Николай Скворцовны (Яңа Элмәле) бәйрәмдә ТР Авыл хуҗалыгы һәм  азык-төлек министрлыгының Мактау грамотасы, кул сәгате белән бүләкләделәр.

-1983 елдан бирле руль артында. “Газиктан” башлаган идем, аннан соң кырык елдан артык гел “КамАЗ” да, - диде Николай Гурьевич.

-Хәзер йөри торганы ничәнче елгы? – дигәч.

-Карт инде, 32 “яшьлек”. Гел ремонтлап, капшап торасы. Быел күбрәк сенаж ташуда эшләдем, кыр юллары буйлап көненә 100-150 километрлар ара үтәргә туры килде, - ди уңган шоферыбыз.

ТР Авыл хуҗалыгы  һәм азык-төлек министрлыгының Мактау грамотасы белән “ЧИРМЕШӘНАГРО” механизаторы  Михаил Корнилов, район авыл хуҗалыгы һәм азык-төлек идарәсенең терлекчелек буенча консультанты Марина Җиһаншина, “БИО-АГРО”ның райондагы идарәчесе Сергей Кикоть та бүләкләнделәр. “Татагрохим” җәмгыятенең бәйрәмдә катнашкан генераль директоры Наил Гөбәйдуллин һәм район башлыгы Рамил Айбатов “Ильхан” җәмгыяте бозау караучысы Тәнзилә Мәссаровага, “БИО-АГРО”дан тракторчы Альберт Галәветдиновка, “Әккәрәй” җәмгыяте бухгалтеры Галина Федоровага әлеге министрлыкның Рәхмәт хатларын тапшырдылар.

-Мин монда Казахстаннан күченеп кайттым. “Ильхан” җәмгыятендә 10 ел бозау караучы булып эшлим. Иртәнге 5тә без эш урынында. Бозаулар – алар яшь бала сыман, чирләтмичә, бик яхшы карап аякка бастырырга кирәк, - диде Тәнзилә Мәссарова.

Авыл хуҗалыгы алдынгыларын хөрмәтләү районыбыз артистларының чыгышлары белән үрелеп барды. Ә алар болай дип тә җырлады:

Җырларга салып җырлана

Сез куйган матур хезмәт.

Алтын куллы хезмәтчәннәргә -

Мактау, дан, кадер, хөрмәт!

Район башлыгының Почет грамотасы иясе:

Гөлсәрия Гыйльмуханова – “Кара Чишмә” җәмгыяте директоры.

Район башлыгының Рәхмәт хатлары белән бүләкләнүчеләр:

Сергей Кудряшов (Ивашкино) – крестьян-фермер хуҗалыгы җитәкчесе, яшелчәче;

Илдар Хәнәфиев (Югары Кәминкә) – “Ильхан” җәмгыяте баш инженеры;

Евгений Матвеев (Лагерка) – “Миронов Л. Н” крестьян-фермер хуҗалыгы механизаторы;

Рәсим Нуруллин (Туймәт) – “ЧИРМЕШӘНАГРОХЕЗМӘТЛӘРЕ” җәмгыяте механизаторы;

Игорь Евстафьев (Югары Кармалка) – “ЧИРМЕШӘНАГРОХЕЗМӘТЛӘРЕ” җәмгыяте механизаторы;

Татьяна Плотникова – “Әккәрәй” җәмгыяте сыер савучысы;

Вадим Мяльдзин – “ЧИРМЕШӘНАГРО” җәмгыятенең бөртек киптерү операторы;

Владимир Кириллов (Яңа Элмәле) – “Сөлчә” җәмгыятенең ферма мөдире;

Людмила Вишнякова – район ветеринария берләшмәсенең баш бухгалтеры.

ФОТОРЕПОРТАЖ 

Марат Гомәров фотолары