Белгечләр чәчүне тизләтергә өнди

Бүген биредә сабан культуралары чәчәләр. Эшне арпа участокларыннан башлаганнар. 500 гектарга якын мәйданны буйсындырганнар да, бу күрсәткеч көн саен уртача 150 гектарга үсә бара.

“БИО-АГРО”, “Кара Чишмә” җәмгыятьләре дә чәчүгә районда беренчеләрдән булып керештеләр. Әлегә барысы 3 мең гектар чамасы мәйданда арпа һәм борчак орлыклары җир куенына салынган.

“Сөлчә”, “Әккәрәй” җәмгыятьләрендә уҗым культуралары, күпьеллык үләннәр участокларын минераль ашламалар белән тукландыруны озакка сузмадылар. “БИО-АГРО”да көнгә уртача 2 мең гектарда тырмалау агрегатлары эшли. Бу агротехник чара тиешленең яртысында башкарылган.

Тулаем, район буенча алганда, 22 мең гектарда, ягъни тиешленең 44 процент өлешендә дым каплатылган. Уҗым культураларын ашлау төгәлләнү ягында.

-Җир өлгерде. Дым каплатуны озакка сузмаска, чәчүне тизләтергә кирәк, - ди район авыл хуҗалыгы һәм азык-төлек идарәсе начальнигы Мирзаһит Гатин. -Орлык һәм ягулык ягыннан проблемалар юк, эре хуҗалыкларда минераль ашламаларны алдан ук кайгырттылар.

Кыр эшләренә – темп һәм сыйфат!