Чирмешәндә яшәүче күп балалы әнигә юл инспекторлары бүләк ясадылар

-Ике ел чамасы руль артында йөрим. Балаларны да еш кына автомобильгә утыртырга туры килә, - ди Татьяна. –Алар  әле кечкенә: олы кызым Викториягә 10 яшь, Софьяга – 6, ә кечкенәсенә – Назарга нибары 1 яшь тә 3 ай. Безнең бер автоутыргыч бар, ә менә икенчесен әлегә кадәр гел кешедән сорарга туры килә иде. Хәзер инде  андый мәшәкать булмаячак. ЮХИДИ бүлекчәсе һәм “Юл хәрәкәте иминлеге” учреждениесе хезмәткәрләренә зур рәхмәт.

Балаларның куркынычсызлыгын тәэмин итү максатыннан 20 майдан 3 июньгә кадәр районда традицион «Игътибар - балалар!» профилактик чарасы игълан ителде.

-Әлеге акциянең төп максаты - балаларның куркынычсызлыгын тәэмин итү шартлары, ягъни баланы махсус утыргычсыз яки куркынычсызлык каешы эләктермәгән килеш машинага утыртып йөрүче әти-әниләрне кисәтү, - ди районның ЮХИДИ бүлекчәсе начальнигы Иван Мясников. – Җәйге каникуллар да башланды.  Әлеге чорда  балалар катнашындагы юл һәлакәтләренең артуы күзәтелә. Шуңа күрә  юл хәвефсезлеге кагыйдәләрен балаларның да тагын бер кат исләренә төшерү мөһим. 

фото: автор