Чирмешән районында җәйге каникуллар вакытында 600дән күбрәк бала лагерьларда ял итәчәк

Мәктәп яны лагерьларының икесендә ял итүче 45 бала хезмәт белән ялны чиратлаштырачак, Яңа Элмәле һәм Әккәрәй мәктәпләрендә хезмәт һәм ял лагеры эшләячәк. Лагерьларның барысында да смена 8 июньдә башлана һәм 21 көн дәвам итәчәк.

“Кояшлы” бәләкәй хуҗаларын 6 июньдә кабул итәчәк, беренче сменада 45 укучы саф һавада ял итеп, сәламәтлеген ныгытачак. Икенче сменада 2 июльдән 22 июльгә кадәр – 55, өченче сменада 30 июльдән 16 августка кадәр – 50, дүртенче – профиль сменада 20-26 августта 20 балага ял оештырырга ниятлиләр.

Балаларның ялын куркынычсыз һәм кызыклы итү сменаны дөрес итеп оештырудан тора. Яллар вакытында күңелсезлекләр килеп чыкмасын өчен санитар таләпләрне дә төгәл үтәргә кирәк. Шуларны кисәтү максатыннан Роспотребнадзорның Нурлат территориаль идарәсе начальнигы Анна Трифонова лагерь начальниклары, вожатыйлар, пешекчеләр, техник һәм медицина хезмәткәрләрен җыеп азык-төлек әзерләү, чисталык булдыру буенча таләпләр үтәлеше буенча лекция укыды һәм шунда ук аларның белемнәрен дә тикшерде - тестлаштыру уздырды.

Фото архивтан