Чирмешән районында 17 янгын һәм 7 ялган чакырту теркәлгән

Агымдагы ел башыннан район территориясендә 17 янгын чыккан. Шул ук чорда чүп-чарга ут кабуның 19 очрагы һәм 7 ялган чакырту теркәлгән.

Торак йортларда янгыннар еш кына янгын куркынычсызлыгының иң гади кагыйдәләрен санга сукмаудан чыга. Күзәтчелек эшчәнлеге бүлеге инспекторлары даими кисәтәләр: мунчада янып торган мичне күзәтүсез калдырмаска, аның артык кызып китүенә юл куймаска, елына кимендә ике тапкыр морҗаларны корымнан чистартырга кирәк. Ләкин күпләр бу турыда "оныталар", ә инде бәла-каза килеп чыкканнан соң үкенәләр, тик соң була.

- Электр приборларыннан файдаланганда да кайбер куркынычсызлык кагыйдәләрен истә тотарга кирәк,- ди күзәтчелек эшчәнлегенең Чирмешән муниципаль районы буенча бүлеге дознавателе эчке хезмәт капитаны Фәрит Яруллин. - Кайбер кешеләр бер розеткага берничә приборны тоташтыралар. Болай ярамаганлыгын мәктәп балалары да белә, югыйсә. Ризык әзерләгәндә янып торган газны да күзәтүсез калдыручылар бар.

Тиешсез урыннарда тәмәке тарту да ут чыгу сәбәпләренең берсе булып тора.

Гаиләләрендә янгын куркынычсызлыгы кагыйдәләренең үтәлеше өчен йорт хуҗалары җаваплы.