Чирмешән районында милли проект кысаларында “Үсеш ноктасы” ачылачак

Бу көннәрдә әлеге мәгариф учреждениесендә ремонт эшләре бара.

-Технология, информатика, өстәмә белем бирү һәм хәвефсез тормыш нигезләре кабинетларында ремонт төгәлләнеп килә. Монда өлешчә электр линиясен һәм җылылык бирү системасын ясап бетерәсе генә калды, - ди Күтәмә мәктәбе директоры Александр Миронов. – Аннан соң инде яңа җиһазлар кайтырга тиеш.

Әлеге мәктәпкә өлешчә ремонт ясау һәм аерым фәннәр буенча кабинетлар ачу өчен 1 миллион 200 мең сум акча бирелгән. Сүз уңаеннан, 2015 нче елны монда капиталь ремонт та булган иде.

-Узган елны,  “Мәгариф” милли проекты кысаларында,  1 нче Чирмешән, Лашман мәктәпләрендә, кадетлар мәктәп – интернатында һәм Чирмешән лицеенда шундый үзәкләр эшли башлады. Киләсе елда шундый ук үзәк Әккәрәй мәктәбендә ясалачак, - ди район мәгариф бүлеге начальнигы Ольга Маркова. - “Үсеш ноктасы” үзәге мәктәп укучыларына сыйфатлы, заманча белем бирү мөмкинлекләрен киңәйттә, балаларда заманча технологик һәм гуманитар күнекмәләр формалаштырырга ярдәм итә.

фото: архив