Чирмешәндә җиңүчеләрне бүләкләр көтә

Яңа елга санаулы гына көннәр калып бара. Быел да районда оешмалар арасында территорияләрне Яңа елга бизәү буенча бәйге игълан ителде. Ул 5 декабрьдән 20 декабрьгә кадәр уза. Конкурсның нәтиҗәләре 25 декабрьдә билгеле булачак.

Җиңүчеләрне ике номинациядә: авыл җирлекләре һәм район үзәгендәге оешмалар, учреждениеләр арасында билгеләп бүләкләячәкләр.

Бу бәйгегә тулаем 120 мең сум акча биреләчәк, җиңүчеләргә Грамоталар, акчалата премияләр һәм кыйммәтле бүләкләр тапшыру каралган. Беренче урын алучылар - 25 мең, икенче-өченче урыннар өчен 20 һәм 15 мең сум акча алачак.

-Комиссия әгъзалары җиңүчеләрне билгеләгәндә, беренче чиратта, территорияләрнең сәнгатьле итеп бизәлүенә, гирляндаларга, кар сыннары, таучыклар булуына, оригинальлеккә, үзенчәлекләргә игьтибар бирәчәк, - ди комиссия рәисе урынбасары, муниципаль район башкарма комитеты җитәкчесе урынбасары Рәмзия Долгополова. - Быел да район оешмалары һәм авыл җирлекләре бу бәйгедә актив катнашырлар, урамнарга, авылларга бәйрәм төсе кертеп, әйләнә-тирәне матурлар дип өметләнәбез.

Кадыйр Гомәров фотосы