Әккәрәйдә сенаж салалар, печән җыялар

-Кечерәк булса да, бу базга байтак масса кайтты, - ди аны көне-төне “К-700” белән таптатуда-тыгызлауда эшләүче Җәсүр Хайткулов. –Хезмәтебезне бәяли беләләр, яхшы ашаталар. Әле бүген пылау белән дә сыйладылар.

Алексей Борисов исә, люцерна кырында бер ягы кипшенгән үләннәрне әйләндерә. Иртә тотынгач, байтак ара үткән. Монда да масса яхшы: куе, өлгергән. 30 елдан күбрәк стажлы бу механизатор сенаж салуда да катнашкан.

Әккәрәй фермерлары – Романовскийларга да эш кызу бүген – костер чабалар, җыялар, урнаштыралар.

-Рулоннарны көне белән алып китәләр, җиткереп булмый, - ди трактор йөртүче Анатолий Романовский.

Хәер, мондый коры, нәкъ өлгергән чагында җыелган печәнгә ничек сорау булмасын ди!

Тулаем, район буенча алганда, 1432 гектар күпьеллык үләннәр чабылган (тиешленең 28 проценты), 210 тонна печән әзерләнгән (4 процент), 600 тонна сенаж салынган (2 процент).

Азык әзерләү темпын бик нык көчәйтү сорала.