Чирмешән районында 2018 елда 226 литр эчемлек законсыз әйләнештән алынган

-Алкоголь әйләнешендә криминаль хәлләрне булдырмау максатында, ел дәвамында 773 тикшерү уздырылды, - ди район полиция бүлекчәсе начальнигы Юлдус Билалов. - Бу чараларның 658 се автоинспекторлар тарафыннан башкарылды. 60 сәүдә ноктасы контрольгә алынды.  Дәүләт алкоголь инспекциясе вәкилләре белән 25 тапкыр рейдка чыктык.

Бу тикшерүләр барышында, алкоголь продукциясенең законсыз әйләнеше өлкәсендә ун административ хокук бозу очрагы ачыкланган. Ике кибетчене (Лашман һәм Иске Үтәмеш авылларында)  чикләнгән вакытта спиртлы эчемлек сатканда тоткарлаганнар. Суд аларга штраф салган.  Законсыз рәвештә алкоголь продукциясен берәмләп саткан алты физик зат административ җаваплылыкка тартылган. Чирмешән, Девичья Поляна, Казанка һәм Керкәле авылларында шундый кырын эш белән шөгыльләнүчеләр дә җәзаларын алганнар.

Автоинспекторлар Лениногорск-Чирмешән трассасындагы рейдлар вакытында ике автомобиль салонын тикшергәндә  акциз маркасыз спиртлы эчемлекләргә тап булганнар. Әлеге эшләр дәүләт алкоголь инспекциясенә тапшырылган.

Иске Котыш кешесенә карата  җинаять эше дә ачылган. Тентү үткәргән вакытта  аңардан 120 литр спиртлы сыеклык,  5 литр самогон һәм 6 шешә аракы алынган.

Хокук сакчылары быел да бу юнәлештә эшчәнлекләрен дәвам итәләр. Әлегә ниндидер закон бозулар ачыкланмаган.

Спиртлы эчемлекләр белән законсыз сәүдә итүчеләр хакында һәркем “Халык контроле” нә яза ала, яки бу турыда полиция бүлекчәсенә хәбәр итәргә була.

Фото Гульсиры Шарифуллиной