Түбән Кармалка хат ташучысы көтелгән кунак кебек
Хәзерге цифрлы технологияләр чорында хат ташучы һөнәре акрынлап үткәнгә китә сыман. Ләкин Түбән Кармалкада түгел! Биредә инде 36 ел хат, пенсия һәм халыкка хәбәрләрне Любовь Курмыгина китерә - аның өчен почтальон эше һөнәр генә түгел, ә чын мәгънәсендә язмышына әверелгән.
Кешеләрне яратып
Любовь Ивановна үзенең хезмәт юлын 19 яшендә хат ташучы буларак башлый һәм һөнәренә тугры кала. Шуннан бирле ул почта гына таратып калмыйча, һәр йортның, һәр гаиләнең көтеп алынган кунагына әверелгән.
-Элек хатлар күп килде, кешеләр башка шәһәрләрдәге туганнары белән языша, бәйрәмнәргә открыткалар ала иде. Газета-журналлар да күп алдырды халык. Матбугат басмаларын таратканда һәр урамныкын аерым алып чыккан хәтердә, бер сумкага гына сыймый иде, - ди ул. - Хәзер хатлар азрак, сирәк кенә телеграммалар, посылкалар да килә, пенсия тарату да - безнең бурыч. Эшемне бик яратам, кеше белән сөйләшү, хәлләрен белү дә ошый миңа.
Һава торышы начар булуга карамастан
Кышын - буранда, җәен - эсседә, язын - пычрак юлларда... Хат ташучыны табигатьнең бернинди капризлары да туктатмый. Теләсә нинди һава торышы булганда ул үзенең адресатлары янына ашыга, чөнки күп кенә пенсионерлар өчен аның килүе - тере аралашу да.
-Кайчагында сине туганнары кебек көтеп алалар. Отпускага китсәм дә югалталар,- дип елмая ул. – Яңа басмаларны көтеп алалар. Бүгенге көндә район газетасын 70 йортка илтәм. Башка төрле газета-журналларны да алдыручылар күп.
Газета-журналларга яздыру кампаниясе башлангач, ул йорт саен кереп, оешмаларга барып квитанция тутыра. Авылның иң актив подписчиклары да бар. Ирина Доброезжева ун төрле басма алдыра, Александр Жиглов, Галина Овсянникова, Николай Трофимов, Николай Кудряшов гаиләләре дә газета –журналлар укырга ярата, алар биш-алты басмага заказ бирә.
Марат Гомәров фотолары
Следите за самым важным и интересным в Telegram-каналеТатмедиа
Нет комментариев