Сосновка авылыннан Ольга Дютина 90 яшендә дә тик торырга яратмый

Юбилярның күзләре начар күрсә, колагы ишетеп бетермәсә дә, автомат кер юу машинасы белән “син” дип сөйләшә, ашарга да үзе пешерә.

-Мин эшсез торырга гадәтләнмәгән, - диде Ольга Сергеевна.

Тугыз дистәсен тутыруына карамастан ул бакчасында үзенә җитәрлек яшелчә үстерә, чүп үләннәренә тынгылык бирми. Әлегә кадәр теплица да тоткан, ул быел гына буш. Юбиляр чисталык ярата, көн аралаш мунча ягып керә.

Ольга Сергеевна ире Николай Егорович белән биш ул, ике кыз үстереп олы тормыш юлына бастыралар. Колхозда хезмәт куялар, балаларын да эш белән тәрбиялиләр. Дютиннар, гомумән, бик уңган гаилә. Алар үз гомерләрендә берничә йорт төзиләр, улларын, кызларын өйле итүдә дә ярдәмнәре зур була.

Балалары да бәхетне ерактан эзләми, уллары Александр гаиләсе белән каршыда гына яшиләр, тагын ике уллары һәм бер кызлары да авылда төпләнгән.

-Әниебез бик уңган, чиста кеше, бездә дә шул сыйфатларны тәрбияләде. Яшь вакытта без ул теккән күлмәкләрне киеп үстек, йонын да эрләде, оекбашлар да бәйләде, - диде кызы Надежда Николаевна. – Әле дә эшсез тора алмый, беребезгә дә барасы килми, ялгызы яши.

Тик балалары аңа ялгызлыкны сиздермиләр, социаль хезмәткәр дә хәлен белеп тора.

Юбилярның 11 оныгы, 15 оныкчыгы, инде оныкчыкларының да балалары бар. Ольга Сергеевна балаларыннан бик канәгать, ул аларны гел мактап кына торды.

-Төп нигездә бәйрәмнәр дә, эш тә бергә башкарыла. Барыбыз да бергә җыелганда 60лап булабыз, - ди балалары. – Әтиебез 2019 елда бакыйлыкка күчте. Әниебезгә махсус хәрби операциядә һәлак булган оныгын да җирләргә туры килде.

Ольга Дютинаны юбилее белән котларга район җитәкчелеге дә килде. Район башкарма комитеты җитәкчесенең социаль мәсьәләләр буенча урынбасары Ләйләгөл Моксинова район башлыгы Рамил Айбатов исеменнән котлау җиткерде һәм бүләк тапшырды. Ульяновка авыл җирлеге башлыгы Самат Шәмсетдинов та буш кул белән килмәгән.