Чирмешәннән Анна Свастьянова оста зоотехник, игелекле килен

-Менә шул фотоларда минем тормыш чагыла, - диде Анна Федоровна юбилее белән котларга килгән кунакларга.

Якташыбызны район башлыгы Рамил Айбатов исеменнән район башкарма комитеты җитәкчесенең социаль мәсьәләләр буенча урынбасары Ләйләгөл Моксинова котлады һәм истәлек бүләге тапшырды.

Удмуртия республикасында үскән Аннаның гомеренең күп өлеше Чирмешәндә узган. Ул мәктәпне тәмамлаганнан соң, авылларыннан ерак булмаган зоотехника техникумында һөнәр үзләштерә, аннан соң укуын Казан ветеринария институтында дәвам итә. Югары белемле зоотехникны юллама буенча Чирмешәнгә җибәрәләр.

-1961 нче елда Надежда Чупахина белән Чирмешәнгә килдек. Казаннан поезд белән Шентала станциясенә кайттык. Ул вакытта барлык кирәк-яракларны ничек алып килеп җиткердек икән дип уйлыйм әле хәзер дә, - дип шул елларны искә төшерде юбиляр. – Фатирда яшәп, “Красный Октябрь” колхозында зоотехник булып эшли башладым. Сөйгән ярымны да шунда таптым.

Алар Анатолий Сергеевич белән гаилә корып ике кыз үстерәләр. Кызганыч, ире белән 12 ел гына яшәп калалар, ул вафат була. Галина белән Иринаны ялгызы тәрбияли. Дөрес, Аннага каенанасы белән аның апасы терәк була. Килен кеше аларны тәрбияләп соңгы юлга озата.

Анна Федоровна гомеренең күп елын зоотехник эшенә багышлый, соңрак терлекчелек буенча бухгалтер вазифаларын башкара.

Юбилярның балачагы һәм үсмер чоры Бөек Ватан сугышы һәм аннан соңгы авыр елларга туры килә. Ул әтисен хәтерләми диярлек, якыны яу кырыннан кайтмаган.

-Ачлык, ялангачлык эләкте инде безнең буынга. Үлән һәм бәрәңге ашап, үлемнән калдык, сыер асрау да коткарды, - ди ул.

Юбилярны котларга килгән дус кызлары да озын гомерле булуларының сере үлән ашап үсүдәдер, диләр. Анна Федоровна бүген дә сәләмәт тормыш рәвеше алып бара, ул көнгә берничә тапкыр чыгып, саф һавада йөри.

Шаян телле юбиляр кызы Галина Анатольевна һәм кияве Александр Николаевич тәрбиясендә яши, биш оныгы, ике оныкчыгы бар.

Кадрия Гамирова фотолары