Ивашкинодан Никоновларның кыярлары апрель башында ук өлгереп җиткәннәр

-Февраль башында чәчкән орлыклар уңыш бирә башлады. Икенче төркемен февраль ахырында утырттым, алары да чәчәктә. Хәзер теплицада 22 төп кыяр үсентесе, - диде Виталий. – Үткән елда да шулай иртә утырткан идем, тик уңыш быелгы кебек иртә өлгермәде.

Никоновларның 9 метрлы теплицаларының бер башында малларга азык пешерү өчен мич урнаштырылган, ул шуның хисабына җылына. Теплицада тиешле температура саклау өчен, аны бүлеп куйганнар.

-Гадәттә, температураны плюс 15 градустан төшермәскә тырышам, махсус яктырткычлар да урнаштырдым. Әле монда ясап бетерәсе эшләр байтак. Яктылык һәм дымлылыкны тиешле нормада тотарга кирәк, -  диде яшь бакчачы. – Эш тәртибен Интернеттан да укыйм, теплица тотучылар белән дә киңәшләшәм.

Никоновларның тартмалардагы помидор үсентеләре дә теплицада, озакламый аларны да күчереп утыртачаклар.