Иске Кади авылында мәчет ремонтланды

-Рәхмәт авылдашларга, хәленнән килгәнчә һәркем булышты, үз өлешен кертте. Берәүләр финанс ярдәме күрсәтсә, икенчеләр күләмле эшләрне башкардылар, - ди район мөхтәсибе Рамил Ибраһимов. – Инде халык авылдагы икенче мәчеттә ремонт башларга ниятли. Дин йортыбыз буш тормый, зур мәчеткә җомга намазына 20-25, Яңа урамдагысына 10-15 кеше җыела.

Дин йортында төзелеш эшләре көз көне үк башланган, тышкы яктан бинаның нигезләрен җылытканнар. Җылылык үткәргечләр алмаштырылган, яңа газ казаны урнаштырылган. Хәзер мәчеттә тәһарәтләнү өчен махсус бүлмә дә бар. Анда канализация челтәре сузып, бойлер куйганнар, краннан кайнар һәм салкын су килеп тора. Тарттырылган түшәмнәр дә ясаганнар, ә идәнгә намаз рәтләре белән заманча келәм җәелгән. Намаз залына яңа мөнбәр дә ясатканнар.

Ремонт эшләре тәмамлангач, авылның хатын-кызлары дин йортын юып чыгарганнар.

фото: Рамил Ибраһимов