Чирмешәндә ике зур спорт объекты ябык

-Физкультура-сәламәтләндерү комплексында демонтаж эшләре февраль аенда ук башланды. Түбә ябучыларның эшләре азаеп бара, - диде район башкарма комитетының яшьләр эшләре һәм спорт бүлеге җитәкчесе Ольга Галиева. – Объектта параллель рәвештә берничә бригада эшли. Спорт залында идәнгә бетон җәелә, душ бүлмәләрендә плитка ябыштыручылар эшли, чишенү-киенү бүлмәләрендә җылытылган идәннәр ясалды, хәзер төзүчеләр бассейн идәнен  “җылыта”. Төзелеш эшләрен сентябрьгә тәмамларга планлыйлар.

Бинаның тәрәзәләре яңартылган, ишекләр дә алмаштырыла. Электр, җылы үткәргечләр, су һәм канализация челтәрләре яңартыла.

Боз сараенда да демонтаж-сүтү эшләре тәмамланган. Осталар стеналарны штукатурлый. Бу спорт объекты да тулысынча яңарачак, түбәне  дә өлешчә алмаштыру планлаштырыла.

Кадыйр Гомәров, Марат Гомәров фотолары