Чирмешән урманчыларына да югары белемле белгечләр җитешми

Чирмешән урманчыларының узган елдагы эшчәнлегенә һәм быелга билгеләнгән бурычларына кагылышлы хезмәт коллективы җыелышында шушындый проблемалар да аталды. Татарстан Республикасының коллегиядә катнашкан Урман хуҗалыгы министры урынбасары Рәис Гомәров урманнарны янгыннардан саклауга бәйле уяулыкны да киметмәскә өндәде.

- Бу яктан сезнең район урманнарында андый ут бәла-казалары булганы юк. Чирмешән урманчылыгы тотрыклы эшләп килә, күзәтү эшчәнлеге алып бара. Ә җитештерү белән шөгыльләнүче урман хуҗалыгы исә узган елда 20 миллион сумнан күбрәк күләмдә продукция җитештергән. Аларның күрсәткечләре дә начар түгел, - диде Рәис Кәлимулла улы.

Чирмешән урманчылыгы җитәкчесе Алмаз Мотыйгуллин сүзләренчә, район территориясенең 36489 гектарын урманнар били, бу барлык мәйданнарның дүрттән бере. Бездә, нигездә, усак агачы күп үсә.

- Урманчыларыбыз, оешмалар һәм район халкы “Хәтер бакчасы”, “Урманнарны саклыйк”, “Татарстанның чиста урманнары” акцияләрендә актив катнаша. 2024 елда шушы рәвешле 44,4 мең төп агач үсентеләре утыртылды, урманнардан чүп-чар җыеп алынды, - диде Алмаз Рифкать улы.

Бүген Лубян урман техник колледжында районнан өч студент укый. Ике хезмәткәр шушы юнәлеш буенча Ульяновск дәүләт университетында читтән торып белем үзләштерә.

Район урманчылары махсус хәрби операция зонасында хезмәт итүче сугышчыларның гаиләләрен былтыр җәмгыяте 408 кубометр күләмендә утын белән тәэмин иткән. Алар Татарстан шефлыгындагы Лисичанск һәм Рубежное шәһәрләренә гуманитар йөк өчен өч тапкыр такта материалы әзерләп бирде. Моның өчен урманчыларыбызга район башлыгы Рамил Айбатов та рәхмәтен ирештерде.

Урманчылар җыенында иң оста, тырыш хезмәткәрләрне бүләкләделәр. Чирмешән урманчылыгының элеккеге хезмәткәре Гүзәл Сафиуллинага Татарстан Республикасының “За доблестный труд” медале тапшырылды.

- Хезмәтеңне шулай бәяләүләре һәркемгә кызык инде ул. Урман эше җиңелләрдән түгел, хезмәттәшләрем тырышып хезмәт куя. Әйтергә генә ансат, урман үстерү өчен күпме көч түгәргә, чыгымнар тотарга кирәк. Бер агач үсәр өчен бер кеше гомере дә җитми, - диде бүләкләнгән якташыбыз.

ФОТОРЕПОРТАЖ 

Марат Гомәров фотолары