Чирмешән музеенда яңа күргәзмә эшли

- Республиканың ветераннар (пенсионерлар) Советы  “Ветераннар – милли мәдәниятне һәм традицияләрне саклаучылар” дигән бәйге игълан итте. Ул Милли мәдәниятләр һәм традицияләр елы кысаларында уздырыла, - диде район ветераннар (пенсионерлар) советы рәисе Миләүшә Батыршина. – Безнең районда да өлкәннәр арасында  оста куллы  кешеләр аз түгел. Шуңа да әүвәл бәйгенең муниципаль этабын оештырырга булдык. Күргәзмәгә районыбызның төрле авылларында яшәүчеләр үзләренең кул эшләрен китерделәр, аеруча, Иске Кади, Иске Үтәмеш, Күтәмә, Бәркәтә ветераннары активлык күрсәттеләр. 

Чиккән, бәйләгән, төрле материаллардан ясалган әйберләр, картиналар, фотоларны шушы күргәзмәдә дә күрергә мөмкин. Әйтик, Иске Үтәмештән Светлана Әхтәмованың декор эшләнмәләре әллә каян игътибарны җәлеп итә. Якташларыбыз арасында алмаз мозаикасы белән шөгыльләнүчеләр дә күп икән. Күргәзмәдә мондый техника белән эшләнгән берничә картина бар.

Миләүшә Тәүфыйк кызы әйтүенчә, җюри җиңүчеләрне билгели, аннары аларның иҗат эшләре Казанда узачак республикакүләм бәйге-күргәзмәдә бәяләнәчәк.

Гөлсирә Шәрифуллина фотолары