Безнең Чирмешән
  • Рус Тат
  • Чирмешән укучылары, рәсем ясап, нәфесне тыярга өндиләр

    Районның мәктәп балалары  коррупциягә, ришвәтчелеккә каршы темага рәсемнәр ясады. Иҗади эшләр олыларны уйланырга мәҗбүр итә. Уйланырга гына түгел, намуслырак, кулга чиста булырга, нәфесеңне тыярга өнди.  Рәсемнәр бәйгесенең исеме дә бит “Намуслы яшәргә кирәк!” дип атала.

    Әнә бирелгән ришвәттән - акчадан баш тартырга тиешле түрә сурәтләнгән; коррупция - глобаль проблема, аның кара болытларыннан җирне чиста куллар саклый; намуссыз булсаң – урының төрмәдә, нәфесеңне тыйсаң – матур тормыш белән яшәрсең... Балалар ришвәтчелек проблемаларын шулай күргән, шулай тасвирлаган.

    -Бәйгенең 25 сентябрьдән 12 октябрьгә кадәр узган район этабында жюри тарафыннан 23 эш арасыннан  җиңүчеләр дип табылган алты укучының рәсемнәре республика этабына, Казанга җибәрелде. Хәзер инде аның нәтиҗәләрен көтәбез. Конкурста аеруча Иске Кади, Шешминка, Лашман мәктәпләре укучылары актив катнашты, - ди район мәгариф бүлегенең   башлангыч белем бирү методисты Эльвира  Гафиева.

    Бәйгенең район этабында җиңүчеләре менә кемнәр: башлангыч сыйныфлар арасында  Сөләйман Гыйрфанов (Иске Кади мәктәбе) – беренче, Азат Кәримов (2 нче Чирмешән мәктәбе) - икенче, Валерия Аброськина  (Күтәмә) өченче урында. 5-9 сыйныфлардан исә  Ләйсән Шарапова  (Чирмешән лицее) - беренче урын иясе. Андрей Евдокимов  (Әккәрәй) - икенче,  Карина Пашнина  (Шешминка)  өченче урында.

    Автор фотолары.

    Реклама

    Иң мөһим һәм кызыклы язмаларны Татмедиа Telegram-каналында укыгыз


    Нравится
    Поделиться:
    Реклама
    Комментарии (0)
    Осталось символов: