Чирмешән районының Иске Кади авылында яшәүче гаилә 17 килограммлы күркәләр үстерә

Камаловларның йортына килеп керүгә озын аякларына йомшак кына басып, кабарынып, ата күркә каршыга чыкты.

-Кайбер күршеләребез дә күркәдән курка, - дип елмаеп каршы алдылар безне хуҗалар.

Аларның йортларында, күркәләрдән тыш, мулардлар, тавыклар, бройлерлар, хәтта кечкенә генә “мексика” нәселле тавык белән әтәч тә бар, әйтерсең, кошчылык фермасы.

-Күркәләрне берничә ел асрыйбыз. Ике ана, бер ата күркәбез бар. Кыш чыктылар, йомырка салып, 12 бәпкә дә чыгардылар, - ди хуҗабикә. – Шунысы кызык, берсе салды, икенчесе утырды. Аның өчен махсус оя ясадык, 28 көн утырды.

Күркәләре инде зур ук булган. Алар өчен урам якта читлек ясап куйганнар.

-Иреккә чыгарсаң, шунда ук күз алдыннан югалалар, бик тиз йөгерәләр, - ди йорт башлыгы.

Күркәләргә әүвәл махсус катнашазык ашаталар, аннаң соң инде бөртек тә бирергә ярый, яшел азык – үлән дә яраталар икән.

- Бу кошның ите төрле витаминнарга һәм микроэлементларга бай, диетик кыйммәткә ия, ашауга да тәмле. Шулпасы да бик тәмле була. Итен иттарткычтан чыгарып кәтлиләр пешерәм, пилмән дә ясап куям. Ана күркәләре 8 килограммга кадәр җитә, ә аталары 16 – 17 килограмм да булырга мөмкин. Күркәләребез йомырка да сала, тавыкныкыннан ике тапкыр зуррак, тәме һаман шул, аерылмый. Беләсезме, алар тавыкларга караганда, бик чиста кошлар, - дип мактап куйды күркәләрен Галия ханым.

фото: автор