Чирмешән районында авыл хуҗалыгы техникаларын комиссия тикшерде

Ул ТР Авыл хуҗалыгы һәм азык-төлек министрлыгының конкурс уздыру турындагы боерыгы нигезендә үтте. Татарстан Республикасы Дәүләт техник күзәтчелеге идарәсе башлыгы урынбасары Рәдис Кадыйров район авыл хуҗалыгы һәм азык-төлек идарәсе белгечләре белән районның авыл хуҗалыгы предприятиеләрендә булдылар. Тикшерү барышында уңай һәм тискәре моментлар билгеләп үтелде, җитешсезлекләр ачыкланды һәм аларны бетерү өчен сроклар билгеләнде.

Комиссия “БИО-АГРО”, “ЧИРМЕШӘН-АГРО”, “Ильхан” җәмгыятьләре, “Тепсуркаев В.Ә.” крестьян-фермер хуҗалыгы машина-трактор паркларында булды. Белгечләр барган көнне дә механизаторлар ремонт эшләре белән мәшгуль иде. “Тепсуркаев В.Ә.” хуҗалыгында һәм “БИО-АГРО” җәмгыятендә төп көчне тагылма агрегатлар төзәтүгә юнәлдергәннәр. “ЧИРМШӘН-АГРО” җәмгыяте механизаторлары йөк машиналарын ремонтлау белән мәшгуль. Казаннан килгән кунакка техникаларның кышкы саклауга куелуы ошады.

-Комбайннарны бик яхшы урнаштыргансыз, чиста, тәртип, рәт-рәт тезелеп торалар, - диде Рәдис Рафил улы. – Тагылма агрегатларны, башка техникаларны да тәртипкә китереп, язгы эшләргә әзерләп куегыз.